Tân Gwyllt yn Rhandirmwyn: Diweddariad am y Digwyddiad

Mae criwiau Gwasanaeth Tân ac Achub Canolbarth a Gorllewin Cymru yn dal i fod ar safle'r tân gwyllt yn ardal Rhandirmwyn, ger Llanymddyfri, wrth i waith diffodd tân barhau am y trydydd diwrnod.

Mae'r Digwyddiad Mawr a gyhoeddwyd ddoe yn parhau mewn grym, gyda Grŵp Cydlynu Tactegol (TCG) aml-asiantaethol yn parhau i gydlynu'r ymateb, cefnogi’r cymunedau yr effeithiwyd arnynt a sicrhau bod y gwasanaethau brys a’n sefydliadau partner yn ymdrin â’r digwyddiad mewn modd cydgysylltiedig.

Mae diffoddwyr tân wedi gweithio trwy’r nos ac i mewn i heddiw i gyfyngu’r tân, mynd i'r afael â’r mannau poethaf a’i atal rhag lledaenu ymhellach. Mae criwiau'n parhau i fod ar y safle yn gwneud gwaith diffodd tân ac yn cadw llygad agos ar yr amodau ar draws yr ardal yr effeithiwyd arni.

Fel mesur rhag ofn, mae sawl eiddo preswyl yn parhau i fod wedi'u gwagio oherwydd bod y tân yn agos atynt. Mae asiantaethau'n parhau i gydweithio i gefnogi'r rhai yr effeithir arnynt.

Mae ffyrdd yn parhau i fod ar gau o amgylch yr ardal yr effeithiwyd arni i gefnogi’n gweithrediadau diffodd tân a chadw’r cyhoedd yn ddiogel. Gofynnir i aelodau'r cyhoedd barchu hyn a dilyn llwybrau’r gwyriadau traffig a ddangosir ar arwyddion.

Bydd canolfan orffwys Cyngor Sir Caerfyrddin yng Nghanolfan Hamdden Llanymddyfri yn parhau i fod ar gael drwy’r dydd heddiw i drigolion y mae’r trefniadau gwacáu yn effeithio arnynt.

Nodyn Atgoffa am Ddiogelwch y Cyhoedd

Wrth i waith diffodd tân barhau yn ardal Rhandirmwyn, gofynnir i aelodau'r cyhoedd:

• Barhau i osgoi'r ardal yr effeithiwyd arni er mwyn caniatáu i'r gwasanaethau brys weithredu'n ddiogel ac yn effeithiol.
• Parchu pob ffordd sydd ar gau a dilyn llwybrau’r gwyriadau traffig a ddangosir ar arwyddion, sydd wedi eu creu i gefnogi camau ymateb brys a diogelwch y cyhoedd.
• Cadw ffenestri a drysau ar gau os yw mwg yn effeithio ar eich ardal ac aros yn y tŷ lle bo'n bosibl. Unwaith y bydd y mwg wedi clirio a'i bod hi'n ddiogel gwneud hynny, awyrwch eich eiddo drwy agor ffenestri a drysau.
• Os ydych chi'n teithio drwy ardaloedd y mae mwg yn effeithio arnynt, cadwch ffenestri'r cerbyd ar gau a gosodwch y cyflyrydd aer i'r modd ailgylchredeg.
• Byddwch yn ofalus iawn wrth deithio'n lleol, gan y gall y mwg ei gwneud yn anoddach i chi weld ar y ffyrdd.
• Peidiwch â hedfan dronau ger y digwyddiad, gan y gallant ymyrryd â gweithrediadau diffodd tân a bod yn risg i ymatebwyr brys.
• Os oes gennych gyflwr anadlol, fel asthma neu COPD, gwnewch yn siŵr bod gennych fynediad at anadlyddion neu unrhyw feddyginiaeth sydd ei hangen arnoch.
• Os yw'r symptomau'n parhau neu ddim yn gwella pan fyddwch chi yn y tŷ ac i ffwrdd o fwg neu ludw, gofynnwch am gyngor gan eich meddyg teulu neu GIG 111.
• Dilynwch ddiweddariadau a chyfarwyddiadau a gyhoeddwyd gan y gwasanaethau brys a’u hasiantaethau partner.
• Ffoniwch 999 ar unwaith os gwelwch fflamau neu os credwch fod bywyd neu eiddo mewn perygl uniongyrchol.