Gwasanaeth Tân ac Achub Canolbarth a Gorllewin Cymru yn ymuno â Menter The BOG STANDARD

Gwasanaeth Tân ac Achub Canolbarth a Gorllewin Cymru (GTACGC) yw’r Gwasanaeth Tân ac Achub cyntaf yng Nghymru i osod biniau iechydol i ddynion ag anymataliaeth a chanser y prostad.

Mae GTACGC yn ymuno â menter The BOG STANDARD phs Group a Prostate Cancer UK, sy’n cefnogi dynion ag anymataliaeth, y mae llawer ohonynt wedi cael triniaeth canser y prostad sy’n achub bywydau

Bydd un o bob wyth o ddynion yn cael canser y prostad ac mae’ch risg yn dyblu i un o bob pedwar os ydych chi’n Ddu, ond gellir ei wella os caiff ei ganfod yn gynnar. Gallai cymaint â 60% o ddynion sy’n cael prostadectomi radical (tynnu’r prostad cyfan a chelloedd canser y prostad y tu mewn iddo trwy lawdriniaeth) brofi anymataliaeth wrinol. Ond, mae cyfleusterau gwaredu addas mewn toiledau cyhoeddus i ddynion yn brin o hyd. 

Ar hyn o bryd, mae dros 1,400 o bobl yn gweithio i GTACGC ac mae 81% o’r rhain yn ddynion.  Mae hyn yn golygu bod nifer enfawr o staff mewn perygl o’r canser mwyaf cyffredin ymhlith dynion, ac o anymataliaeth a all fod yn un o sgil-effeithiau’r driniaeth.

Er gwaethaf y ffigurau syfrdanol hyn, ychydig iawn o sefydliadau sydd wedi gwneud trefniadau i ofalu am ddynion ag anymataliaeth, ond ni fydd hyn yn broblem i ddynion yng GTACGC.  Mae’r sefydliad wedi gosod 26 o finiau anymataliaeth sydd wedi’u dylunio’n arbennig i ddynion (sy’n ddigon mawr ar gyfer nwyddau anymataliaeth i ddynion) ar draws 22 o’i safleoedd.

GTACGC yw’r sefydliad Tân ac Achub cyntaf yng Nghymru i osod biniau iechydol sydd wedi’u dylunio’n arbennig ar gyfer dynion mewn toiledau dynion. Mae’r biniau’n addas ar gyfer dynion ag anymataliaeth, y mae llawer ohonynt wedi cael triniaeth canser y prostad sydd wedi achub eu bywydau. 

Trwy gefnogi dynion a rhoi’r mesurau hyn ar waith, mae GTACGC wedi ymrwymo i BOG STANDARD – sef y safonau gofynnol y mae Prostate Cancer UK a’r darparwr gwasanaethau hylendid phs Group, yn gofyn i sefydliadau eu rhoi ar waith ar gyfer dynion ag anymataliaeth. 

Siarter BOG STANDARD

Mae Siarter BOG STANDARD yn achrediad haenog, sy’n caniatáu i glybiau wneud yr ymrwymiad lleiaf i ddynion – ac yna gweithio tuag at sgôr BOG STANDARD aur.

• Efydd – gosod biniau iechydol – sef yr achrediad BOG STANDARD gofynnol
• Arian – gosod biniau iechydol a nwyddau anymataliaeth i ddynion, i gefnogi dynion a allai gael eu dal hebddynt tra byddant yn mynd o gwmpas
• Aur – rhoi’r uchod ar waith, ynghyd ag ymrwymiad i hybu ymwybyddiaeth o ganser y prostad ac anymataliaeth – dyma’r safon y mae Gwasanaeth Tân ac Achub Canolbarth a Gorllewin Cymru wedi’i chyrraedd.

Dywedodd Kelsey Tiffin, o Adran Ystadau GTACGC: 

“Yn yr un modd â llawer o gyflogwyr, doedden ni ddim yn gwybod bod hyn yn broblem a oedd yn effeithio ar gymaint o ddynion, ond cyn gynted ag y daethom yn ymwybodol, roedden ni eisiau cymryd camau i gefnogi ein tîm.

Rydyn ni am sicrhau y gall pob dyn yng Ngwasanaeth Tân ac Achub Canolbarth a Gorllewin Cymru deimlo’n hyderus wrth ddod i’r gwaith, gan wybod y bydd ganddynt y cyfleusterau sydd eu hangen arnynt i gael gwared ar eu padiau anymataliaeth. Nid yw byth yn hawdd siarad am ollyngiadau’r bledren, ond mae mor bwysig ein bod ni’n gwneud hyn ac yn lleihau’r stigma sy’n gysylltiedig ag ef, oherwydd mai canser y prostad mor gyffredin.

Rydym yn gobeithio’n fawr y bydd y biniau’n codi ymwybyddiaeth o ganser y prostad, yn ogystal ag atgoffa’r dynion ar ein tîm i gael eu prawf PSA gan y meddyg teulu cyn gynted â phosibl.”  

Erbyn hyn, mae cyfanswm o 2,172 o fusnesau a sefydliadau ledled y DU wedi cofrestru ar gyfer BOG STANDARD. Mae cyfanswm o 21,757 o finiau iechydol wedi’u dylunio’n arbennig ar gyfer dynion wedi’u gosod ers i fenter Dispose with Dignity phs Group a Prostate Cancer UK gael ei lansio ym mis Chwefror 2023. phs Group yw’r unig ddarparwr hylendid sy’n cynnig biniau wedi’u dylunio’n benodol ar gyfer nwyddau anymataliaeth i ddynion, a ddatblygwyd gyda chefnogwyr Prostate Cancer UK. 

Nod menter Dispose with Dignity, sy’n hybu Siarter BOG STANDARD, yw rhoi’r hyder i ddynion fynd ati i fyw eu bywydau bob dydd, heb y pryder o beidio â bod ag unman i newid a gwaredu eu padiau anymataliaeth mewn toiledau cyhoeddus.

Dywedodd Prif Swyddog Gweithredol phs Group, Matthew Brabin:

“Ar adeg pan mae angen i ddynion gael eu cefnogi gan fusnesau a gweithleoedd, efallai ar ôl cael triniaeth ar gyfer canser y prostad, mae gormod o ddynion yn rhy bryderus i adael y tŷ, oherwydd nad yw’r cyfleusterau cywir ar gael iddynt.

P’un a ydynt yn mynd i’r gwaith, i gynhadledd, i’w clwb chwaraeon lleol neu hyd yn oed i’r dafarn leol i gael peint, pan nad oes biniau iechydol ar gael, mae dynion ag anymataliaeth yn aros gartref pan ddylen nhw fod gyda ni. Dyna beth mae ein menter Dispose with Dignity yn ceisio’i newid ac rydym mor falch o weld GTACGC yn ymuno â’r frwydr trwy ymuno â Siarter BOG STANDARD.”

phs Group yw’r darparwr gwasanaethau hylendid mwyaf blaenllaw yn y DU, Iwerddon a Sbaen, a bu’n cydweithio â Prostate Cancer UK, sef yr elusen iechyd dynion blaenllaw, er 2023 i ymgyrchu dros gyfleusterau gwell i ddynion ag anymataliaeth, yn rhan o’u cynllun Dispose with Dignity.

Prostate Cancer UK yw’r cyllidwr cyhoeddus mwyaf ar gyfer ymchwil i ganser y prostad yn y DU, ac mae wedi buddsoddi dros £120 miliwn mewn ymchwil sydd wedi sicrhau bod diagnosis a thriniaeth canser y prostad yn fwy diogel ac yn fwy manwl gywir nag erioed o’r blaen. Mae’r elusen hefyd wedi helpu degau o filoedd o ddynion i ymgyrchu dros newid, gan rannu eu hanesion i ddylanwadu ar y rhai sy’n llunio polisïau, ac eirioli dros frwydro anghydraddoldebau iechyd, codi ymwybyddiaeth sy’n achub bywydau, a gwella’r gallu i gael triniaethau a chymorth sy’n gwella bywydau dynion ac yn creu dyfodol mwy disglair i ddynion sy’n byw gyda’r canser mwyaf cyffredin yn y DU, sef canser y prostad, ac ar ei ôl.

Dywedodd Pennaeth Gwasanaethau Cymorth Prostate Cancer UK, Nick Ridgman:

"Mae angen biniau iechydol ar lawer o ddynion er mwyn iddynt allu cael gwared ar badiau y maent wedi’u defnyddio mewn modd disylw a hylan – ond, yn aml, nid yw’r biniau hyn ar gael yn unman mewn toiledau dynion. Mae’n achosi straen a chywilydd i ddynion ac yn eu hatal rhag mynd i’r gwaith a gwneud y pethau maen nhw’n eu mwynhau.

Mae GTACGC yn sicrhau bod y sefydliad yn fwy croesawgar a hygyrch i bob cyflogai, ac rydym yn gobeithio y bydd sefydliadau eraill yn dilyn. Rydym yn cefnogi menter Dispose with Dignity yn llwyr ac yn gobeithio gweld Llywodraeth y DU yn cefnogi ein galwad i newid canllawiau HSE. Dyma’r unig ffordd y gallwn sicrhau y bydd dynion yn gallu manteisio ar fin iechydol i ddynion os ydynt yn defnyddio toiledau mewn mannau cyhoeddus.

Mae Prostate Cancer UK yma i bob dyn sy’n ymdrin â chanser y prostad. Os oes angen unrhyw gymorth neu wybodaeth arnoch, gallwch siarad â’n Nyrsys Arbenigol ar 0800 074 8383 neu drwy ein gwefan."