Taith Diwylliant Gwasanaeth Tân ac Achub Canolbarth a Gorllewin Cymru

Mae Gwasanaeth Tân ac Achub Canolbarth a Gorllewin Cymru (GTACGC) yn parhau i symud ymlaen ar ei daith o drawsnewid a gwella ei ddiwylliant yn y gweithle.

Gan weithio i gyfres o argymhellion a amlinellir yn Adolygiad Diwylliant Annibynnol Crest Advisory, a gyhoeddwyd yn 2025, mae GTACGC wedi gweithredu amrywiaeth o gamau i sicrhau newidiadau hirdymor, diriaethol a chynaliadwy i ddiwylliant y sefydliad.

Roedd yr adolygiad yn dilyn Llywodraeth Cymru ym mis Mawrth 2024 yn derbyn cynnig gan GTACGC a Gwasanaeth Tân ac Achub Gogledd Cymru i ddeall yn well cynnydd gwelliannau i ddiwylliant sefydliadol ym mhob Gwasanaeth.  Rhoddodd yr Adolygiad Diwylliant Annibynnol asesiad manwl o'r dirwedd ddiwylliannol o fewn GTACGC a nodi cryfderau a meysydd i'w gwella.

Dros y flwyddyn ddiwethaf, mae GTACGC wedi rhoi nifer o fentrau mawr ar waith sydd wedi'u cynllunio i gyflawni gwelliant diwylliannol hirdymor, cynaliadwy. Mae'r rhain yn cynnwys:

Cryfhau arweinyddiaeth a datblygiad diwylliannol

Mae arbenigwyr diwylliant annibynnol Senseia wedi cael eu comisiynu i gefnogi'r Gwasanaeth am ddwy flynedd, gan gyflwyno gweithdai arweinyddiaeth a datblygiad un-i-un ar draws uwch reolwyr a rheolwyr canol. Mae Grŵp Arweinyddiaeth a Datblygu Sefydliadol newydd yn moderneiddio llwybrau arweinyddiaeth a chynnydd.

Llais staff cryfach

Mae'r Tîm Pobl a Diwylliant (PACT) bellach wedi'i ymgorffori fel mecanwaith canolog ar gyfer ymgysylltu â staff, gan sicrhau bod profiadau byw yn llunio penderfyniadau a newid sefydliadol.

Llywodraethiant, gwneud penderfyniadau cliriach

Mae mewnwelediadau o weithdy "Glasbrint ar gyfer Newid" a Cynllun Rheoli Risg Cymunedol (CRhRC) 2040 yn llywio trefniadau llywodraethiant wedi'u diweddaru a Fframwaith Rheoli Newid Gwasanaeth cyfan newydd.

Gwell recriwtio, safonau a chefnogaeth

Mae'r Gwasanaeth wedi cryfhau tryloywder mewn recriwtio a dyrchafiad, wedi ehangu hyfforddiant a dysgu digidol, ac wedi parhau i ddatblygu darpariaeth lles a safonau proffesiynol.

Ymrwymiad ar Gyfer Newid Adnewyddedig

Wrth i GTACGC agosáu at ei ben-blwydd yn 30 oed ym mis Ebrill, mae'r sefydliad yn mynd i mewn i gyfnod o uchelgais newydd a newid pwrpasol.

Mae penodi Prif Swyddog Tân newydd, Craig Flannery, ym mis Rhagfyr 2025, wedi dod ag arweinyddiaeth newydd a ffocws ac ymrwymiad o'r newydd i ddod â newid diriaethol a chynaliadwy i'r sefydliad.

Dywedodd y Prif Swyddog Tân Flannery:

"Wrth i ni symud i'r bennod newydd hon ar gyfer Gwasanaeth Tân ac Achub Canolbarth a Gorllewin Cymru, fy mlaenoriaeth yw sicrhau bod newid diwylliannol nid yn unig yn cael ei drafod ond yn cael ei gyflawni. Mae ein staff yn haeddu gweithle lle maen nhw'n teimlo eu bod yn cael eu gwerthfawrogi, eu cefnogi a'u grymuso, ac mae ein cymunedau'n haeddu Gwasanaeth sydd bob amser y gorau y gall fod.

"Rydym yn cymryd camau ystyrlon i gryfhau ymddiriedaeth, gwella ein systemau a'n hymddygiad, a chreu amgylchedd lle gall pawb ffynnu. Mae hwn yn ymrwymiad hirdymor, ac rwy'n benderfynol y bydd y camau rydym yn eu cymryd nawr yn dod â buddion parhaol i'n pobl a'r cymunedau rydym yn eu gwasanaethu."

Nod y ffocws newydd hwn yw gwella gallu'r Gwasanaeth i ddarparu atal, amddiffyn ac ymateb argyfwng rhagorol i gymunedau Canolbarth a Gorllewin Cymru, nawr ac ar gyfer y dyfodol.