Digwyddiad: Tân Mewn Eiddo ym Mhort Tennant yn Abertawe

Am 10.33yp ddydd Sul, Awst 3ydd, galwyd criwiau Gwasanaeth Tân ac Achub Canolbarth a Gorllewin Cymru (GTACGC) o Orsafoedd Tân Canol Abertawe, Gorllewin Abertawe a Phort Talbot eu galw i ddigwyddiad ym Mhort Tennant yn Abertawe.

Ymatebodd y criwiau i dân mewn tŷ pâr deulawr.  Roedd y tân wedi datblygu’n dda ac wedi’i leoli mewn ystafell wely ar lawr cyntaf yr eiddo.  Roedd y camau diffodd tân cychwynnol yn cynnwys defnyddio chwistrell olwyn piben 22mm i gyfeirio difon o ddŵr i lintel yr ystafell yr effeithiwyd arni i helpu i wasgaru dŵr ar y tân. 

Roedd pobl oedd yn sefyll y tu allan i’r tŷ yn credu bod pobl yn dal i fod y tu mewn i’r eiddo, felly cafodd Diffoddwyr Tân yn gwisgo setiau o offer anadlu eu hanfon i mewn i’r eiddo.  Diolch byth, ar ôl diffodd y tân a chwilio’r eiddo’n drylwyr, ni chanfuwyd unrhyw gleifion yn yr eiddo.  Defnyddiodd y criwiau gyfanswm o chwe set o offer anadlu, dwy chwistrell olwyn piben, camerâu delweddu thermol ac un ysgol estyniad byr i ddiffodd y tân.

Roedd angen ymateb aml-asiantaeth i’r digwyddiad hwn, gyda chriwiau’r Gwasanaeth Tân ac Achub yn gweithio’n agos gyda phersonél Heddlu De Cymru i reoli’r digwyddiad.

Diogelwch Canhwyllau

Ar ôl diffodd y tân, cynhaliwyd Ymchwiliad Tân, a nododd fod y tân wedi'i achosi'n ddamweiniol gan gannwyll yn llosgi yn yr eiddo.

Bydd GTACGC bob amser yn annog pobl i beidio â defnyddio canhwyllau.  Fodd bynnag, rydym yn deall y bydd llawer o bobl am eu defnyddio am amryw o resymau gwahanol.

Mae’n bwysig cofio bod canhwyllau yn fflam agored a all achosi dinistr os cânt eu gadael heb neb i ofalu amdanynt neu’n agos at arwynebau fflamadwy.

Gallwch gael gwared o’r risg i chi a’ch cartref drwy ddilyn cyngor diogelwch canhwyllau syml:

• Peidiwch byth â gadael canhwyllau wedi'u cynnau heb oruchwyliaeth. Rhowch ganhwyllau cynn allan pan fyddwch chi'n gadael yr ystafell, a gwnewch yn siŵr eu bod nhw allan yn llwyr ar ôl i chi orffen gyda nhw.  Os ydych chi'n mynd allan, rhowch hi allan.
• Peidiwch â llosgi nifer o ganhwyllau yn agos at ei gilydd, gan y gallai hynny achosi i'r fflam dasgu. Gadewch o leiaf 10cm (4") o fwlch rhwng dwy gannwyll sy'n llosgi.
• Peidiwch â symud canhwyllau ar ôl eu cynnau.
• Peidiwch byth â chynnau canhwyllau, llosgwyr na sigaréts pan fyddwch wedi blino neu'n teimlo'n gysglyd.
• Gosodwch ganhwyllau/losgwyr olew ar arwyneb sefydlog sy'n gallu gwrthsefyll gwres.
• Cadwch ganhwyllau allan o gyrraedd plant.

Mae mwy o wybodaeth ar ddiogelwch canhwyllau ar gael yma.